ENTRAR ÁREA PRIVADA

NOTICIAS Y ACTUALIDAD

//: noticias / noticias

Noticias y actualidad relacionada con Citexvi y su entorno


Pór en valor a figura do ?commuity manager? é un dos obxectivos do Día das Redes Galegas

CCSS e da Comunicación reivindica, en galego, ás e aos profesionais das redes sociais

Dúas egresadas e un egresado do centro abordaron as súas experiencias profesionais neste eido

Unha “xornada de exaltación” da figura dos e das xestores de comunidades virtuais, das redes sociais e da presenza do galego na rede. Deste xeito presentaba o profesor Xabier Martínez Rolán o Día das Redes Galegas, o evento que, con este triplo obxectivo, acolleu nesta xornada a Facultade de Ciencias Sociais e da Comunicación. Tres profesionais formados no centro achegaron as súas experiencias neste eido a unha xornada na que tamén se abordou o proxecto Youtubeir@s.

Unha “xornada de exaltación” da figura dos e das xestores de comunidades virtuais, das redes sociais e da presenza do galego na rede. Deste xeito presentaba o profesor Xabier Martínez Rolán o Día das Redes Galegas, o evento que, con este triplo obxectivo, acolleu nesta xornada a Facultade de Ciencias Sociais e da Comunicación. Tres profesionais formados no centro achegaron as súas experiencias neste eido a unha xornada na que tamén se abordou o proxecto Youtubeir@s e que alcanza a súa cuarta edición, lembrou o vicerreitor do campus en funcións, Juan Manuel Corbacho, “nun momento moi importante para a facultade e para o campus, porque vense de aprobar o mestrado universitario en Comunicación en Medios Sociais e Creación de Contidos Dixitais”, que comezará a impartirse neste centro o vindeiro curso académico.


Lucía Gómez, directora de márketing de contidos e medios sociais de Elogia; Cristina García, responsable de comunicación e márketing dixital en Esmerarte Industrias Creativas; Jorge Medal, redactor e guionista de formatos televisivos, e a técnica da Área de Normalización Lingüística (ANL) da Universidade Cristina Rodríguez foron as e o protagonista dunha xornada que conta co apoio da facultade, Vicerreitoría do campus, ANL e Secretaría Xeral de Política Lingüística da Xunta de Galicia. Unha xornada dirixida a “demostrar que no eido da comunicación dixital e das redes sociais hai un futuro moi prometedor”, como sinalou Rolán, que naceu como Social Media Day, reconvertido o pasado ano no Día das Redes Galegas para incidir en que “nas redes sociais é un dos lugares onde o galego se xoga o seu futuro”. Así o sinalou na inauguración o secretario xeral de Política Lingüística, Valentín García, quen defendeu internet como “un gran mar de oportunidades”, no que “temos que estar coa nosa lingua e coa nosa cultura”.


Nese mesmo senso, o decano, Xosé Baamonde, lembrou que “a sociedade galega ten que debater que fai” co idioma, se facer del “unha lingua morta que queda como obxecto de estudo que sacamos a pasear o Día das Letras, ou unha lingua viva coa que participamos nas redes sociais” e “facemos vida normal”. Previamente, o director da ANL, Paulo Cabral, puxo o acento en que “internet é o lugar onde máis medra o galego” e o medio “máis democrático e participativo ”, polo que “do grao de implicación das persoas que fan xestión das comunidades virtuais” dependerá, engadiu, ser “capaces de chegar moi cerca, pero sobre todo, moi lonxe e moi dentro” co idioma.


Do márketing dixital á industria musical


Un coloquio moderado polo profesor Alberto Dafonte completou unha xornada que Lucía Gómez abriu afondando no proceso de traballo que desenvolven no eido do márketing dixital desde Elogia. Tamén falou da súa experiencia profesional Jorge Medal, neste caso de como a produción televisiva e as redes sociais “son plataformas distintas” cun mesmo obxectivo, xerar contidos. Concretamente, abordou a súa experiencia na última edición de Operación Triunfo, “un caso desmesurado” de como moitos formatos de televisión “incrementan audiencias ou conseguen xerar ruído grazas ás redes”. Redes que son tamén un espazo no que, no eido do audiovisual, “cada vez temos máis contidos propios e exclusivos”, polo que, apuntou, “pronto poden ser o buque insignia do que beban as outras plataformas”. Cristina García, pola súa banda, abordou como as redes sociais supuxeron “unha revolución” na industria musical, onde se converteron nunha “ferramenta potentísima para visibilizar proxectos”, como lanzamentos discográficos ou concertos e festivais, así como para “xerar diálogo e conectar cos fans”.


A serie de relatorios completouse afondando na experiencia de Youtubeir@s, un proxecto dirixido a fomentar a presenza do galego nesta rede social a través de varias liñas de acción, como o concurso de creación de vídeos que o pasado venres celebraba a entrega de premios da súa segunda edición. “O potencial das redes é inimaxinable, non só como medio de difusión e promoción do galego, senón tamén como fin é hora de xerar comunidade, visibilizar, divulgar..., para estarmos no mundo na nosa lingua e na nosa realidade”, sinalaba nese senso Cristina García, responsable de presentar unha iniciativa promovida polas tres universidades galegas, os servizos de normalización lingüística de nove concellos e a Deputación da Coruña.


A importancia dos e das profesionais


Este Día das Redes Galegas serviu así mesmo para pór en valor a necesidade dunha “figura especializada” na xestión das redes sociais, que “poder ser un claro diferenciador de marca” nun mundo que se precisa “dunha linguaxe propia que varía en cada rede”, como sinala Medal. “As redes sociais son, actualmente, a canle máis directa e utilizada para conversar cos usuarios, consumidores e seguidores, o antigo teléfono de atención ao cliente”, engade Cristina García, quen sinala que os xestores de comunidades virtuais “unha figura fundamental practicamente en calquera sector” e que polo tanto debe “estar en constante conexión cos clientes e potencias clientes”, así como “ser rápido ofrecendo solucións”, xa que “son moitas as vías polas que se pode manchar a reputación dunha empresa”.

Volver

Fuente: DUVI